Autenticar
Main menu

A AEG utiliza cookies para o melhor funcionamento do portal.

O uso deste site implica a aceitaçom do uso das ditas cookies. Podes obter mais informaçom aqui

Aceitar
Vocabulário do futebol e futebol gaélico já tem 2ª ediçom disponível de graça

Vocabulário do futebol e futebol gaélico já tem 2ª ediçom disponível de graça

A Comissom Lingüística da AEG inicia os seus trabalhos com umha segunda ediçom, revista e acrescentada, da obra realizada anteriormente no seio da AGAL.

Eis a introduçom realizada para esta segunda ediçom pola Comissom Lingüística da AGAL, que desde já disponibilizamos para descarga gratuita.

 

Descarrega o pdf aqui

Apresentaçom da segunda ediçom do Dicionário Galego do Futebol

A Comissom Lingüística da Associaçom de Estudos Galegos (CL-AEG), continuadora da Comissom Lingüística da AGAL, congratula-se de poder oferecer aqui, como fruto dos seus trabalhos inaugurais no seio da AEG, a segunda ediçom do Dicionário Galego do Futebol, cuja primeira ediçom, lançada em setembro de 2015, representou um notável contributo para o melhoramento da expressom galega no domínio do futebol, tam presente na vida quotidiana e na cultura popular da Galiza hodierna.  

A presente segunda ediçom do Dicionário, para além de corrigir lapsos e preencher lacunas que ocorriam na versom anterior, vê-se consideravelmente enriquecida pola incorporaçom de cerca de 80 conceitos e correspondentes termos próprios do futebol gaélico, modalidade desportiva de grande interesse e atualidade para o nosso público, umha vez que, nos últimos tempos, tenhem surgido entre nós várias equipas, masculinas, femininas e mistas, algumhas das quais (as mistas) jogam umha liga galega (a Liga Gallaecia), e que mesmo se formou umha seleçom nacional galega de futebol gaélico, que goza de reconhecimento internacional e já disputou um campeonato do mundo; além disso, deve salientar-se que todas as equipas galegas de futebol gaélico utilizam com normalidade a língua autóctone da Galiza, e várias delas, de facto, conforme o padrom galego do galego-português.  

A respeito do contingente de termos e conceitos próprios do futebol gaélico aqui compilados, cumpre advertir, em primeiro lugar, que só se incorporam como novos, e com a marca «fut.gael», aqueles elementos que som peculiares ou mais caraterísticos desse desporto, de modo que quase todos aqueles que o futebol gaélico compartilha com o futebol (como camisola, jogada individual, pontapé ou treinador(a)) o consulente desta obra deverá procurá-los nos verbetes providos da marca «fut», cujas definiçons, embora em muitos casos explicitamente referidas ao futebol, também se revelam válidas para o futebol gaélico com pouca ou nengumha adaptaçom; em segundo lugar, cabe assinalarmos que, para a fixaçom dos termos galego-portugueses próprios do futebol gaélico, aqui seguimos um critério vernaculista, evitando ou secundarizando, tanto quanto possível, os anglicismos que freqüentemente grassam nas línguas románicas (e nom só) durante as etapas iniciais de implantaçom nos respetivos ámbitos dos desportos nascidos ou codificados em países anglófonos, como é o caso do futebol gaélico na atual Galiza. Por tal motivo, cunham-se aqui, com algumha freqüência, neologismos de feiçom galega, que se oferecem ao público na esperança da sua difusom e naturalizaçom, vernaculizaçons, estas, que, em bastantes casos, fôrom feitas mediante o entroncamento do vocabulário do futebol gaélico na terminologia galego-portuguesa do futebol, o que nos parece um expediente assaz natural e económico (assim, por exemplo, como equivalente galego-português de ingl. small rectangle, propom-se aqui pequena área ou área de baliza, e extremo como equivalente preferente de ingl. corner forward).  

Na altura de lançarmos esta segunda ediçom do Dicionário Galego do Futebol, fazemos votos por que, a partir de agora, e em prol da regeneraçom formal e funcional do galego-português da Galiza, a Comissom Lingüística da Associaçom de Estudos Galegos tenha oportunidade de abordar novos projetos de caráter terminográfico e divulgador.

Comissom Lingüística da AEG, janeiro de 2016

Última modificação emSexta, 22 Janeiro 2016 00:24
Avalie este item
(2 votos)

214 comentários

Deixe um comentário

Certifique-se de preencher os campos indicados com (*). Não é permitido código HTML.

voltar ao topo

Facebook Twitter RSS Global